विश्वकप दर्शन नियमावली (संशोधित), २०७५
अब केही दिनपछि (१४ जुन, ३१ जेठ) विश्वकप फुटबल रसियामा हुँदैछ। अघिल्लो पटक विश्वकप हुँदा हामीले विश्वकप दर्शन नियमावली, २०७१ यही माइसंसारमा राखेका थियौँ। यो वर्षका लागि त्यसैलाई संशोधन गरी पारित गरिएको छ। संसदमा बजेट अधिवेशन चलिरहेको हुनाले र माननीयहरु बजेटमै धेरै व्यस्त हुनुपर्ने हुनाले दर्शकहरुको सर्वसम्मतिमा विशेष व्यवस्था गरी यो नियमावली पारित गरिएको छ।
प्रस्तावना
लात्तेभकुन्डो (फुटबल) खेलको सम्पूर्ण खेल प्रकृया र नियमबारे थोरैलाई थाहा भए पनि विश्वस्तरका खेल समीक्षक हुँ झैँ गरी विद्वता छाँट्नेहरुका कारण समय समयमा विवाद आइराख्ने भएको कारण विश्वकप खेल दर्शनलाई व्यवस्थित र मर्यादित पार्नु वाञ्छनीय भएकोले नियमावलीको अभावमा सँधै किचलो हुन नदिन संसदमा रहेका र नरहेका सबै दलको सहमतिमा नियमको तर्जुमा गरिएको छ।
परिच्छेद-१
१. संक्षिप्त नाम र प्रारम्भः
(क) यो नियमावलीको नाम “विश्वकप दर्शन नियमावली, २०७५” रहेको छ ।
(ख) यो नियमावली विश्वकप फुटबलप्रति रुचि राख्ने दर्शक र उनीहरुको परिवारको हकमा मात्र लागू हुनेछ ।
(ग) यो नियमावली तुरुन्त प्रारम्भ हुनेछ ।
२. परिभाषा:
विषय वा प्रसङ्गले अर्को अर्थ नलागेमा यस नियमावलीमा:
(क) “विश्वकप” भन्नाले हरेक चार-चार वर्षमा स्विट्जरल्यान्डमा मुख्यालय भएको फिफा नामको खेलसम्बन्धी आइएनजिओले आयोजना गर्ने लात्तेभकुन्डो (यसपछि फुटबल भनिएको) प्रतियोगिता सम्झनु पर्दछ ।
(ख) “फुटबल” भन्नाले आयातकार चौडा मैदानमा एउटा बल फालेर ११ जनाको दुई टिमले त्यसैलाई छिनाझपटी गर्दै खेल्ने खेल सम्झिनु पर्दछ।
(ग) “रेफ्री” भन्नाले खण्ड (ख) अनुसारको खेललाई नियमभित्र रही मर्यादित बनाउन व्यवस्था गरिएको मैदानभित्र खेलाडीसँगै दायाँबायाँ दौड्ने तर बल छुन नपाउने मनुवा बुझ्नु पर्छ। मनुवा सिद्धान्ततः तटस्थ हुनुपर्ने भए पनि पौराणिक ग्रन्थमा देउतासमेत तटस्थ नहुने देखिएकोले कहिलेकाहीँ कसैको पक्ष लिएको जस्तो देखिए पनि त्यसलाई अन्यथा नलिई उसले गरेको निर्णयलाई नै सर्वोपरी ठान्नुपर्दछ।
(घ) “सहायक रेफ्री” भन्नाले खण्ड (ग) अनुसारको व्यक्तिको सहयोगका लागि व्यवस्था गरिएको मैदानभित्र नभई बाहिरतिरबाट झण्डा लिएर दायाँबायाँ दौडिरहने मनुवा सम्झनु पर्दछ।
(ङ) “गोल” भन्नाले मैदानमा रहेको गोलो भागमा बल राख्नु नभई मैदानको छेउमा लामखुट्टे पस्न नदिन राखिएको
